పశ్చిమ మధ్య బంగాళాఖాతం లో ఉన్న అసాని‘ తీవ్రమైన తుఫాను మే 10వ తేదీ మధ్యాహ్నం 12 గంటల సమయానికి కాకినాడకు ఆగ్నేయంగా 210 కి.మీ, విశాఖపట్నంకు నైరుతి దిశలో 310 కి.మీ దూరంలోను మరియు గోపాలపూర్ కు 530 కి.మీ మరియు పూరీకి 630 కి.మీ దూరంలో ఉన్నది. ఇది 11వ తేదీ ఉదయానికి కాకినాడ మరియు విశాఖపట్నం ప్రాంతాలకు చేరువగా వచ్చిన తరువాత మరల వంపు తిరిగి ఉత్తర మరియు ఈశాన్యవైపుగా ప్రయాణిస్తూ వాయువ్య బంగాళాఖాతంలోకి చేరే అవకాశం ఉంది. 11వ తేదీ ఉదయానికి తీవ్రమైన తుఫాను నుంచి తుఫానుగా బలహీనపడుతుంది మరియు 12వ తేదీ ఉదయానికి వాయుగుండంగాను బలహీనపడుతుంది. దీని ప్రభావంగా ఉత్తర కోస్తా జిల్లాలలో 10వ తేదీ రాత్రి నుంచి భారీ వర్షాలు కురుస్తాయి. అలాగే మే 10 వ తేదీ రాత్రి నుంచి 11 వ తేదీలలో సముద్ర తీరంలో అలలు 8 నుంచి 12 అడుగుల వరకు ఎగిసిపడతాయి మరియు సముద్ర తీరంలో గాలి వేగం 11 వ తేదీ ఉదయానికి 60 నుంచి 75 కి.మీ వేగంతో ఉండవచ్చు. దీని ప్రభావం ఎక్కువగా కృష్ణా జిల్లా తీరం నుంచి విశాఖపట్నం తీరం వరకు ఉంటుంది. కావున మత్స్యకారులు అప్రమత్తంగా ఉండి మే 12వ తేదీ వరకు చేపలవేటకు వెళ్ళరాదని సూచిస్తున్నాము.