தமிழ்நாட்டில் தரங்கம்பாடி முதல் பழையர் கடற்கரை, மாமல்லபுரம் - சென்னை கடற்கரை, பாயிண்ட் காலிமர் - நாகப்பட்டினம் கடற்கரை மற்றும் திருச்செந்தூர் கன்னியாகுமரி கடற்கரை, ஆகிய இடங்கள் கடல் ஆமைகள் முட்டையிடும் இடமாகக் கண்டறியப்பட்டு உள்ளது. ஆனால் நம் மன்னர் வளைகுடா பகுதியில் தற்போது கடல் ஆமைகள் முட்டையிடுடவது கிட்ட தட்ட கடந்த கால நினைவாகப் போய்விட்டது. பெருகிவிட்ட விசை படகுகளினால் அதிக சேதாரம் ஏற்படுகிறது. இது தவிர கடற்கரையில் இடப்படும் முட்டைகளுக்கு நாய், நரி போன்ற விலங்குகளாலும், கடல் அரிப்பினாலும் கெடுதல் ஏற்படுகிறது. மீனவர்கள் விசைப்படகுகளின் மூலம் மீன்பிடிக்கும்போது மீன்பிடி வலைகளில் டெட் எனப்படும் ஆமை தவிர்ப்புக் கருவியைப் பொருத்திக் கொண்டால் வலைகளில் ஆமைகள் மாட்டி இறப்பதைத் தவிர்க்க முடியும். மேலும் கடல் ஆமைகள் முட்டையிடும் கடற்கரைகளின் இயற்கை நிலையை மாற்றாமல் பாதுகாக்கவேண்டியது நமது தலையாய கடமையாகும்.